მთავარი » ფაილები » ფული და ბავშვები

ფული და ბავშვები
04.06.2008, 17:47
ყველგან ისმის – ფული, ფული, ფული...ზრდასრული ადამიანებისაგან ეს კიდევ გასაგებია, მაგრამ ბავშვებიც რომ ითხოვენ მას? ბოლო დროს უფულობის თემა კატასტროფული სისწრაფით იზრდება – თურმე ნაყინისა და წვენების გარდა "ჩიფსებიც" უნდა იყიდოთ, რადგან "ყველა ყიდულობს". გუშინ ვიღაც გოგო სკოლაში ახალი ფეხსაცმლითა და ლამაზი "ლასინებით" მოვიდა – ესეც ყველას აქვს, მე კი არა! და რა ქნან იმ ბავშვებმა, ვისი მშობლების მატერიალური მდგომარეობაც არ იძლევა მსგავსი ნივთების ყიდვის საშუალებას – ძალიან საჭირო ნივთების შესაძენადაც კი ზოგიერთ მათგანს არ ჰყოფნის ფული.

ფულთან დამოკიდებულება ჩვენს საზოგადოებაში მართლაც ელვის სისწრაფით იცვლება. ადრე ყველა ერთნაირ ხელფასს იღებდა (ან ასე თვლიდნენ), ხოლო ახლა ყველაფერი შეიცვალა – გამოჩნდნენ ღარიბები, ძალიან ღარიბები, მდიდრები და ძალიან მდიდრები. საზოგადოების დაყოფა სოციალურ ფენებად ჯერ კიდევ არ დამთავრებულა. ამიტომ ხშირად "ახალი ქართველების" შვილების გვერდით სწავლობენ ძალიან ღარიბი ოჯახის შვილები. და ამ ორ უკიდურესობას შორის კიდევ მრავალი "საშუალო" ფენაა. ერთი მოსწავლე დასასვენებლად პარიზში მიდის, ხოლო მეორეს ბუფეტში შესასვლელი ფულიც კი არ აქვს. ამ ყველაფერს ბავშვები ძალიან მტკივნეულად განიცდიან. თუმცა არა მარტო ბავშვები.

ბავშვებს მთელი არსებით უნდათ გამოიყურებოდნენ ისე, როგორც სხვები. მათთვის სასიცოცხლო მნიშვნელობა აქვს ისე ჩაცმას, როგორც სხვები იცმევენ, მოუსმინონ იმავე მუსიკას, წაიკითხონ იგივე წიგნი.

ბევრი ბავშვი ეძებს გამოსავალს ფულის დამოუკიდებლად შოვნაში. კარგია, თუ ისინი ფულს სახლიდან არ იპარავენ, ან არ ყიდიან სახლიდან მოპარულ წიგნებს, არამედ ეძებენ გამომუშავების საშუალებას.

დასავლეთში ბევრი სკოლის მოსწავლე მუშაობს სწავლისაგან თავისუფალ დროს, და არაფერი განსაკუთრებული ამაში არ არის. ჯერ ერთი, ეს აჩვევს ბავშვებს მოფრთხილებით მოეპყრან ფულს, აიძულებთ სხვანაირად შეხედონ მშობლების შრომას, და ისინი უკვე დაჟინებით აღარ ითხოვენ ამა თუ იმ მოწონებული ნივთის ყიდვას, რადგან იციან, თუ რა ძნელია ფულის შოვნა; მეორე – ეს ბავშვებს თავდაჯერებას მატებს, თავისებურ დამოუკიდებლობას და რაღაც ახალის შეგრძნებას – მომინდება და ყოველ დღე ვიყიდი ნაყინს, ან ვიდეო-კასეტას. რა თქმა უნდა, ეს ყველაზე ჭკვიანური გამოსავალია.

ხშირად ბავშვებს არ ესმით, თუ რატომ აქვთ ზოგიერთ მათ თანატოლს ყველაფერი, ხოლო თვითონ თითქმის არაფერი, ეს ერთგვარი შურის გრძნობას იწვევს მათში. და მშობლებს ადანაშაულებენ იმაში, რომ არ შეუძლიათ უყიდონ ისეთივე ფეხსაცმელი ან ველოსიპედი, როგორიც სხვას აქვს. ამ სიტუაციაში რა თქმა უნდა ბავშვს კატეგორიულად ვერ დაადანაშაულებთ. ადვილი არ არის უყურო სხვებს, თუ როგორ აქვთ ყველაფერი, ხოლო თვითონ მოკლებულნი არიან მსგავს ფუფუნებას, მოითხოვოთ მათგან "ფილოსოფიურად" შეხედონ ცხოვრებას. თუმცა ვინ იცის, იქნებ ბავშვობაში გადატანილმა განცდებმა მისცენ სტიმული იმისათვის, რომ ამოძვრნენ სიღატაკიდან და უქონელი არსებობიდან.

შური – მეტ-ნაკლებად ყველა ადამიანს ახასიათებს, ხოლო ბავშვებს ყველაზე მეტად. იგი მოსვენებას არ აძლევს ბავშვს იმის გამო, რომ მის კლასელს აქვს რაღაც ლამაზი ნივთი, ხოლო მას – არა, იმ მიზეზით, რომ სახლში ფული არ აქვთ. ბავშვი იწყებს ნერვიულობას, თუ როგორი არასამართლიანია ცხოვრება. ამ შემთხვევაში მშობლების ამოცანაა – როგორმე მაინც შეუმსუბუქონ მათ პრობლემა.

მაგალითად, თუ თქვენს შვილს ძალიან უნდა სახლში ჰქონდეს კომპიუტერი, რომლის ყიდვაც თქვენი ბიუჯეტიდან გამომდინარე წარმოუდგენელია, ეცადეთ მისცეთ მას შესაძლებლობა გაეცნოს ამ საგანს, ითამაშოს კომპიუტერზე თუნდაც ინტერნეტ-კაფეში. თუ თქვენს ქალიშვილს ისეთივე კაბა სურს, როგორიც მის დაქალს აცვია, სცადეთ შეუკეროთ ისეთივე კაბა. აქ მთავარია შუბლით კი არ გაამტვრიოთ კედელი იმისთვის, რაც უნდა, არამედ ისწავლოთ (და ასწავლოთ), თუ როგორ უნდა იცხოვროთ რაღაცის გარეშე, გიხაროდეთ ახლობლის წარმატებები და შეეგუოთ გარდაუვალს.

თუ თქვენ გამუდმებით წუწუნებთ, რომ ბედი უსამართლოდ გექცევათ, იმის მიუხედავად, რომ ნიჭიერიც ხართ, ლამაზიც და შეგიძლიათ კიდეც, და ამას ბავშვის თანდასწრებით აკეთებთ, იგი სწრაფად დაკარგავს იმის განცდას, რომ ახარებდეს ის, რაც აქვს. ამიტომ, მოერიდეთ ბავშვებთან არაკეთილგანწყობილ ლაპარაკს ნათესავებსა და მეგობრებზე, თუ რატომ აქვთ მათ ფული, თქვენ კი არა. და არასოდეს გამოამჟღავნოთ თქვენი აგრესია მათთან ერთად.

და კიდევ ერთი რჩევა მშობლებს: ნუ დაღონდებით, თუ თქვენს შვილს ვიღაცის შურს და ნუ შეეცდებით, რომ რაც უნდა მოხდეს ჩაახშოთ ბავშვში ეს შურის გრძნობა. მიეცით ბავშვს საშუალება, ღიად გამოხატოს თავისი განცდები, ხოლო შემდეგ ერთად გადაწყვიტეთ, თუ როგორ მოიქცეთ.


კატეგორია: ფული და ბავშვები | დაამატა: baby
ნანახია: 1259 | რამოტვირთვები: 0 | რეიტინგი: 1.0/1
სულ კომენტარები: 0
კომენტარის დამატება შეუძლიათ მხოლოდ დარეგისტრირებულ მომხმარებლებს
[ რეგისტრაცია | შესვლა ]